ගුරු විදුහල්පති අකුරට වැඩ කරන්න හිතයි

ගුරු විදුහල්පතිවරුන්ට හා දෙමාපියන්ට ඇති වී තිබෙන ගැටලු විසඳීමට ආණ්ඩුව කටයුතු නොකරන නිසා මේ මස 22  වැනි දින සිට අකුරට වැඩ කිරීමේ වෘත්තීය ක්‍රියා මාර්ගයක් ආරම්භ කරන බව ගුරු විදුහල්පති වෘත්තීය සමිති සන්ධානය සඳහන් කරයි.

 මේ අනුව පාසල් වේලාවෙන් පසු ද, සති අන්තයේ දිනවල හා නිවාඩු දිනවලද විෂය පරිබාහිර කටයුතු සිදුනොකරන බවත්, වට්ස් ඇප් සමූහ හරහා බලධාරීන් සමග රාජකාරි කටයුතු සිදුකිරීමේ කටයුතුවලින්ද ඉවත්වන බවත් එම සන්ධානය පෙන්වා දෙයි.

  පාසල් වේලාවෙන් පසු, නිවාඩු දිනවල හා සති අන්තයේ දිනවල ගුරු විදුහල්පතිවරුන් රාජකාරි විශාල ප්‍රමාණයක් සිදුකරන බවත්, අදාළ ගැටලු විසඳන ලෙස ඉල්ලා මේ මස 22 වැනි දින සිට සති දෙකක කාලයක් පරිබාහිර රාජකාරිවලින් ඉවත් වී අකුරට වැඩ කිරීමේ වෘත්තීය ක්‍රියා මාර්ග සිදුකරන බවත් ඔවුහු සඳහන් කරති.

 ඉන් පසුව ඉදිරි ක්‍රියා මාර්ග සිදුකිරීමට සැලසුම් කර තිබෙන බවත්, ගුරුවරුන්ගේ වැටුප් විෂමතා විසඳීම යටතේ තුනෙන් දෙකක කොටස ලබා දෙන ලෙසත්  පාසල් උපකරණ මිල අඩු කිරීමේ වැඩපිළිවෙළක් සකස් කරන ලෙසත්  පාසල් නඩත්තුව සඳහා නිසි ලෙස මුදල් වෙන් කර පාසල් නඩත්තු කටයුතු සඳහා දෙමාපියන්ගෙන් මුදල් එකතු කිරිම සිදුනොකරන ලෙසත් ඉල්ලා මෙම ක්‍රියා මාර්ගය සිදුකරන බවද බව ගුරු විදුහල්පති වෘත්තීය සමිති සන්ධානය සඳහන් කරයි.