කාන්තා හිංසනය හා ප්‍රචණ්ඩත්වය පිටුදකිමු

ජාත්‍යන්තර කාන්තා දිනය වෙනුවෙන් Ogilvy Sri Lanka සහ, ශ්‍රී ලංකාවේ කාන්තාවන්ට සහ ගැහැනු දරුවන්ට එරෙහි ප්‍රචණ්ඩත්වය පිටුදැකීම සඳහා කටයුතු කරන Women In Need (WIN) සංවිධානය එක්ව සංවිධානය කළ දැනුවත් කිරීමේ වැඩසටහනක් මාර්තු මස 08 දා පිටකොටුව බෝ ගහ අසලදී පැවැත්විණි.

'Masterpiece of Abuse' යනු හිංසනය පිළිබඳව සහ හිංසනයේ ගොදුරු බවට පත් වී ඉන් ගැලවුණු කාන්තාවන් පිළිබඳව සමාජය දැනුවත් කිරීම අරමුණු කරගෙන, ජාත්‍යන්තර කාන්තා දිනය නිමිත්තෙන් නිරාවරණය කරනු ලබන මූර්තියක් වන අතර කාන්තාවන්ට මුහුණ දීමට සිදු වූ ප්‍රචණ්ඩකාරී සිදුවීම් සහ අපයෝජනයන් පිළිබඳ කරුණු ඇතුළත් පුවත්පත් පිටු යොදාගෙන මෙම මූර්තිය නිර්මාණය කර තිබේ. 

කාන්තා දිනයේදී පමණක් මාධ්‍යයන් හි කතිකාවට ලක්වන සුබපැතුම් හා බලගැන්වීමට වලට වඩා ප්‍රබල ලෙස ‘අත්හැරීමේ කලාව’ (forsaken art)  මගින් වසර පුරා අපයෝජනයට හා හිංසනයට ලක්වන කාන්තාවන්ගේ යථාර්ථය සමාජයට නිරූපණය කිරීම මෙහි අපේක්ෂාව විය.

දිවයින පුරා කාන්තාවන්ට මුහුණ දීමට සිදුවන මෙම ගැටලු මෙන්ම, ඒවාට මුහුණ දුන් කාන්තාවන් එදිනෙදා ජීවිතයේදී මුහුණ දෙන දුෂ්කර අභියෝගයන් පිළිබඳව  මෙහිදී ජනතාවගේ අවධානයට යොමුකෙරිණි. 

ඡායාරූප - ශාන්ත රත්නායක