ඔන්මැක්ස් ඩී.ටී. අධ්‍යක් ධනංජයගේ රු. කෝටි දෙකක ඉඩමක් තහනම් කරයි

නීති විරෝධී පිරමීඩාකාර ගනදෙණු කරමින් රුපියල් කෝටි ගණනක ජනතා මුදල් වංචා කළේ යැයි කියන ”ඔන්මැක්ස් ඩී.ටී.” ආයතනයේ අධ්‍යක්ෂක ධනංජය ජයාන් නමැත්තාට අයත් රුපියල් කෝටි දෙකකට අධික වටිනාකමින් යුත් අත්තනගල්ලේ පිහිටි අක්කර දෙකහමාරක ඉඩමක් කොළඹ ප්‍රධාන මහේස්ත්‍රාත් තිළිණ ගමගේ මහතා අද (18) තහනම් කළේය.

පිරමීඩාකාර ගනදෙණු කරමින් රුපියල් කෝටි ගණනක ජනතා මුදල් වංචා කළැයි කියන ”ඔන්මැක්ස් ඩී.ටී.” ආයතනයේ අධ්‍යක්ෂකවරුන්ගේ සියලු දේපළ වහාම අත්පත් කරගෙන අධිකරණයට ඉදිරිපත් කිරීමට මීට පෙර දින ප්‍රධාන මහේස්ත්‍රාත්වරයා කළ නියෝගයකට අනුව රහස් පොලීසිය තෙතාරතුරු අනාවරණය කරගෙන අධිකරණයට වාර්තා කළ අත්තනගල්ලේ ඉඩම මෙලෙස තහනම් කළ මහේස්ත්‍රාත්වරයා ඒ පිළිබඳ අත්තනගල්ල ඉඩම් රෙජිස්ට්‍රාර්වරයාට දැනුම් දීමටද නියම කළේය.

නීති විරෝධී පිරමීඩාකාර ගනදෙණු කරමින් වංචනිකව ජනතාවගෙන් ලබාගත් මුදල් වලින් ”ඔන්මැක්ස් ඩී.ටී.” ආයතනයේ අධ්‍යක්ෂකවරුන් දේපළ මිලදී ගෙන ඇති බවටත් මුදල් විවිධාකාර ආයෝජනය වලට ලක්කර තැන තැන හංගා ඇති බවටත් මීට පෙර අවස්ථාවක ඉදිරිපත් වු කරුණු සලකා බැලීමෙන් අනතුරුව අදාළ ආයතනයේ අධ්‍යක්ෂකවරුන්ගේ සියලු දේපළ වහාම අත්පත් කරගෙන අධිකරණයට ඉදිරිපත් කිරීමට නියම කෙරිණී.

නඩුව අගෝස්තු 07 වැනිදා යළි කැඳවීමට මහෙස්ත්‍රාත්වරයා නියම කළේය.