ඇමති විජිත වැඩ භාර ගනියි

විදේශ කටයුතු, විදේශ රැකියා සහ සංචාරක අමාත්‍ය ලෙස දිවුරුම් දුන් විජිත හේරත් මහතා අද (18) සිය අමාත්‍ය ධුරයේ වැඩ භාරගෙන ගත්තේය. විදේශ කටයුතු අමාත්‍යාංශයේදී අමාත්‍යවරයා සිය රාජකාරි භාර ගත්තේය.

ඔහු මීට පෙර ප්‍රවාහන, මහජන ආරක්ෂක, මහාමාර්ග, වරාය සහ සිවිල් ගුවන්සේවා අමාත්‍යවරයා ලෙස කටයුතු කළේය. විජිත හේරත් මහතා කැලණිය විශ්වවිද්‍යාලයේ විද්‍යාවේදී උපාධිධාරියෙකි. 

අමාත්‍ය විජිත හේරත් මහතා පාර්ලිමේන්තු මන්ත්‍රීවරයෙකු ලෙස 2000 වසරේ සිට ගම්පහ දිස්ත්‍රික්කය නියෝජනය කරයි. මෑතකදී අවසන් වූ මහ මැතිවරණයේදී, ශ්‍රී ලංකා පාර්ලිමේන්තු මැතිවරණ ඉතිහාසයේ අපේක්ෂකයෙකු ලබා ගත් ඉහළම මනාප ඡන්ද සංඛ්‍යාව ලබා ගනිමින් ඒ මහතා නැවත තේරී පත් වූයේය.