සුවබර නින්දක් සඳහා ගත හැකි සුවදායී පිළියම්

ඕනෑම කෙනෙකුගේ ජීවිතයට සුව නින්දක් ලැබීම භාග්‍යයකි. එහෙත් ඇතැම් කෙනෙකුට සුව නින්දක් ලබාගැනීම සඳහා බාධා ඇති වේ. ඒ සඳහා බලපාන නොයෙකුත් කායික හා මානසික හේතුන් තිබිය හැකිය. අද අප උත්සාහ කරනුයේ ටොලමියානු ජ්‍යෝතිෂ වාස්තු විද්‍යා නියමය අනුව සුව නින්දක් ලබාගැනීම සඳහා පොදුවේ භාවිත කළ හැකි කරුණු කිහිපයක් පිළිබඳව ඔබව දැනුම්වත් කිරීමටය. මේ ඒ සඳහා ප්‍රවීණ ටොලමියානු ජ්‍යෝතිර්වේදී කේ.සී.ජේ. රත්නායක මහතා සමග කළ කතාබහකි.

සුව නින්දක් සඳහා දකුණ, නැගෙනහිර, බටහිර, නිරිත, යන දිශාවන්ට හිස යොමු කොට සයනය කිරීම වඩාත් උචිත වේ.
උතුර, ඊශාන, ගිනිකොන, යන දිශා 3ට හිස යොමුවන සේ සයනය කිරීම යෝග්‍ය නොවේ. සයනය සඳහා භාවිත කෙරෙන ඇඳ ඉහළින් හෝ එම ඇඳට ස්පර්ශ වන පරිදි දැවමය හෝ කොන්ක්‍රීට් කුලුනු පියගැටපෙළ ආදිය තිබීම අහිතකර වේ. සයනය සඳහා යොදාගනු ලබන ඇඳ ඇතිරිලි, බ්ලැන්කට්, කොට්ට උර යනාදිය තද රතු, කළු, සහ අඳුරු වර්ණයන්ගෙන් යුතු වීම සුව නින්දක් කෙරෙහි බාධා ඇති කෙරේ. හැකි සෑම විටකම ඇඳ ඇතිරිලි සහ පොරෝනා ආදිය ළා පැහැති වර්ණයන්ගෙන් යුතු විය යුතු අතර, ඒවා අධික බර හා රළු පරළු ස්වභාවයෙන් තොර විය යුතුය. ඉහත විස්තර කළ සාධක සම්පූර්ණ වී තිබියදී සුව නින්දක් ඔබට අහිමි වන්නේ නම් ඒ සඳහා ජ්‍යෝතිෂමය වාස්තු නියමයන් පරිදි කළ යුතු පිළියම් ගණනාවක් බටහිර ජ්‍යෝතිෂය තුළ ඉගැන්වේ.

නින්දට පෙර ඉතා අඩු ශබ්දයෙන් සියුම් සංගීත ඛණ්ඩයකට සවන්දීම හොඳ පිළියමකි. ලංකාවේ නම් අපට ඒ සඳහා පිරිත් හෝ බෞද්ධ ගාථාවන් හෝ නොඑසේනම් මිහිරි සංගීත ඛණ්ඩයක් ශ්‍රවණය කළ හැකිය.
රාත්‍රී කෑමෙන් පසුව නින්දට පෙර මද උණුසුම් වතුර වීදුරුවකට දෙහි හෝ ලෙමන් බිංදු 3ක් මුසුකොට පානය කිරීම සුව නින්දක් සඳහා පහසුවක් වේ.

නින්දට පෙර මද උණුසුම් ජලයෙන් යටිපතුල් හා පා ඇඟිලි සේදීමෙන්ද සුවබර නින්දක් සඳහා අවකාශ සැලසේ.
තවත් කෙනෙකුට කොතෙක් පහසුකම් තිබුණද නින්ද නොලැබෙන්නේ ඇතැම් විට මානසික පීඩනය නිසා විය හැකිය. එවැනි කෙනෙකුට භාවිත කළ හැකි විකල්ප ක්‍රම 2ක් ටොලමියානු ජ්‍යෝතිෂය තුළ විස්තර කෙරේ.
ඉන් පළමු වැන්න වන්නේ නින්දට පෙර මිනිත්තු 30ක කාලයේදී මනෝමයෙන් ගණන් කරමින් පියවර 100ක් අඩු වේගයකින් සක්මන් කිරීමයි.

අනිත් විකල්පය වනුයේ නිදි යහන මත වැතිර දෙනෙත් පියාගෙන බිංදුවේ සිට 100 දක්වා මනෝමයෙන් ගණන් කිරීම හා 100 සිට 0 දක්වා අවරෝහණ ක්‍රමයට මනෝමයෙන් ගණන් කිරීම මෙන්ම නැවත 0 සිට 100 දක්වා ආරෝහණ ක්‍රමයකට ගණන් කිරීමයි. මේ අවස්ථා 3 අතරතුර සුව පහසු නින්දක් සඳහා අවශ්‍ය පරිදි ඔබේ ශරීරය හා මනස සකස් කරයි.

අක්‍රමවත් නින්ද සහ නින්ද සම්බන්ධයෙන් ගැටලු ඇති සියලුදෙනාට පොදුවේ භාවිත කළ හැකි තවත් ප්‍රශස්ත ක්‍රමයක් වන්නේ මනස හා ශරීරය මනා ලෙස සකස් කොට ගැනීමට සමබරතාව පුහුණුවීමයි. ඒ සඳහා එක් උදාහරණයක් වන්නේ රාත්‍රී නින්දට මිනිත්තු 45කට පෙර මද වේගයෙන් සක්මන් කිරීමයි. එය කරන්නේ මෙසේය.

ඔබේ නිවස ඇතුළත සක්මන් කිරීමේදී පියවර සියයක් මනෝමයෙන් ගණන් කරමින් පියවර ඒකාකාරී වේගයකට පියවර මාරු කරන්න. මෙහිදී ඔබගේ යටිපතුල් පොළොවේ ස්පර්ශ වන මොහොත මනසින් ග්‍රහණය කරගනී. 1 සිට 100 දක්වා පියවර මාරු කර පසු  නැවත ඔබ 100 සිට 1 දක්වා අවරෝහණය ආකාරයට මනෝමයෙන් ගණන් කරමින් මේ අභ්‍යාසයේ යෙදෙන්න. සාමාන්‍යයෙන් මිනිත්තු 15කට නොඅඩු හා මිනිත්තු 30කට නොවැඩි කාලයක් ඒ සඳහා භාවිත කරන්න.

නින්ද ඇති කිරීම සඳහා නොයෙකුත් පෙති වර්ග පානය කරන කෙනෙකු නම් ඉහත විස්තර කළ විකල්ප කෙරෙහි අවධානය යොමු කොට ඒවායෙහි අගය වටහා ගන්න. මීටත් අමතරව තවත් කළ හැකි ප්‍රශස්තම පිළියමක් වන්නේ නිදි යහනට පිවිස ඇඳේ වැතිර ඔබේ දෙකන් බාහිර පැත්ත කන්පෙති දාරය සුළැඟිල්ලේ අාධාරයෙන් මෘදු ලෙස වක්‍රාකාරව උත්තේජනය කිරීමයි. මේ ශක්ති උත්තේජන ක්‍රමයද සුව නින්දක් සඳහා ආධාර උපකාර වේ.

ඔබේ ගැටළු යොමු කරන්න. - [email protected]

කෂිනි හපුආරච්චි